светлогорску-60: лента событий

В июле нынешнего года Светлогорск отметит свой 60-й день рождения. Много событий больших и малых произошло за это время  в жизни города и горожан. Давайте вместе перелистаем  страницы нашей районной газеты, чтобы узнать, чем жил Светлогорск и его жители в разные годы. Так что читайте, вспоминайте и удивляйтесь!                                     

1961 год

Завершана будаўніцтва пасёлка будаўнікоў. На праспекце Леніна каля Палаца культуры пасаджана алея акацый.

У Доме культуры энергетыкаў адбыўся вечар «У свеце музычнага мастацтва». З лекцыяй выступіла мастацкі кіраўнік Дома культуры М. Савіч. У выкананні жаночага хора і вучаніц музычнага гуртка прагучалі ўрыўкі з оперы «Евгений Онегин» і раманс М. Глінкі “Северная звезда”.

За год у дамах адпачынку, санаторыях Рыжскага ўзмор’я і на курортах Чорнага мора па прафсаюзным пуцёўкам адпачылі 80 чалавек.

[свернуть]
1962 год

У раённай газеце “Агні камунізму” за дрэнную работу крытыкаваўся таварыскі суд вёскі Забалацце. Абраны новы старшыня Андрэй Цітавіч Радкевіч.

Штодзённа са Светлагорскага аэрапарта самалёты робяць тры рэйсы ў Гомель, два – у Акцябрскі і адзін рэйс у Мінск.

[свернуть]
1963 год

У чырвоным кутку сёмага інтэрната трэста №20 больш за 200 чалавек сабралася на канферэнцыю чытачоў па раману І. Мележа «Людзі на балоце». Такую ж канферэнцыю гарадская бібліятэка правяла таксама ў клубе будаўнікоў.

Рыбалоў Павел Вашчанка на Бярэзіне злавіў рыбу вагой 18-19 кг і нават 25 кг.

[свернуть]
1964 год

Змястоўныя сатырычныя газеты выпускаюцца саветамі інтэрнатаў №№ 3,5,7. Орган камсамольскай арганізацыі БУ-150 “Пражэктар” змяшчае едкія карыкатуры з трапнымі подпісамі і заметкі. Крытыкуе тых, хто дрэнна паводзіць сябе, перашкаджае змагацца за камуністычны быт.

Брыгада Мінскай студыі хранікальна-дакументальных фільмаў зняла фільм “Светлагорск будуецца”. Сцэнарый фільма напісаў беларускі пісьменнік Алесь Шашкоў.

За адзін толькі дзень 23 сакавіка на завод штучнага валакна паступілі дыфтанометры з Казані, кабель з Ленінграда і Мазыра, прыборы цеплакантролю з Варонежа, цэнтрыфугі з Кургана, помпы з электрарухавікамі са Свярдлоўска, медны дрот з Ерэвана.

[свернуть]
1965 год

Каб зрабіць прыгожую прычоску, многія светлагорцы ездзяць на чыгуначную станцыю Шацілкі, дзе працуе цырульнікам Сямён Абрамавіч Дворкін. Больш за 30 год свайго жыцця ён аддаў гэтай прафесіі.

Рабочыя, служачыя, інжынерна-тэхнічныя работнікі завода зборнага жалезабетону №11 сабраліся на мітынг, каб выказаць свой рашучы гнеў ізраільскім агрэсарам, якія пачалі ваенныя дзеянні на Блізкім Усходзе.

[свернуть]
1966 год

У доме №15 пражывае 93-гадовая Васіліса Міхайлаўна Пакроўская, у якой 27 унукаў і праўнукаў. Хрысціне Іванаўне Сідаровіч — 91 год. Яна таксама жыве ў гэтым доме і няньчыць ўнукаў.

Новым паліграфічным абсталяваннем папоўнілася раённая друкарня. Зманціраваны друкарская машына-саманаклад “МПС” і пазалотны прэс.

[свернуть]
1967 год

Па суботах, нядзелях і ў святочныя дні на экранах тэлевізараў бывае няяркае адлюстраванне. Справа ў тым, што ў гэтыя дні Васілевіцкая ДРЭС накіроўвае на лініі электраэнергію з паніжаным напружаннем.Так, рэтранслятар замест 200 вольт атрымлівае энергію напружаннем у 160-180 вольт.

Жыхар Ф.Вежнавец атрымаў ордэр на кватэру №29 у доме №24, што ў першым мікрараёне.Але радасць аказалася нядоўгай, да першага дажджу. Столя ў новай кватэры адразу стала мокрай, у вуглах з’явілася сырасць, якая хутка стала распаўсюджвацца па сценах.

У канторы глыбокага разведвальнага бурэння з’явілася механічная майстэрня. Тут выточваюць асобныя дэталі, якія потым адпраўляюць на буравыя.

Упершыню ў Светлагорску праведзена выстаўка твораў светлагорскіх мастакоў. Яе ўдзельнікі – В.Баранаў, М.Бай, М.Дакучаеў, У.Юшпрах, Ю.Якун, А. Ярашэўскі.

[свернуть]
1968 год

“Сам сабе гаспадар” — у заметцы пад такім загалоўкам, змешчанай у газеце “Агні камунізму”, адзначалася дрэнная работа магазіна ў вёсцы Печышчы. Яго загадчык Н.Кудзін злоўжывае сваім службовым становішчам, ходкія тавары прадае знаёмым і блізкім. Намеснік старшыні райспажыўсаюза тав. Зібараў паведаміў, што за парушэнне правіл гандлю тав. Н. Кудзін будзе папярэджаны на сходзе пайшчыкаў в. Печышчы.

Работніцы завода штучнага валакна А.Сцепаненка ў майстэрні камбіната бытавога абслугоўвання пад чорныя туфлі прыбілі белыя абцасы. Дырэктар камбіната бытавога абслугоўвання М. Злотнік паведаміў, што названыя факты мелі месца. На туфлі пастаўлены чорныя абцасы.

Газавыя пліты ўсё больш і больш заваёвываюць прызнанне.За перыяд газіфікацыі Светлагорска і населеных пунктаў раёна блакітны агонь увайшоў у быт 6.013 кватэр.

[свернуть]
1969 год

Заканчваецца будаўніцтва гасцініцы.Да канца года светлагорцы справяць наваселлі ў дамах №12Б, 24, 31, у доме жыллёва-будаўнічага кааператыву №4. Пакупнікоў сустрэнуць новыя магазіны – прамтаварны і харчовы. Будуецца кніжны і гароднінны магазіны. У горадзе будзе два вучылішчы: адно – пры цэлюлозна-кардонным камбінаце, другое – пры заводзе па вытворчасці камплектуючага абсталявання і механізмаў для аўтаматычных ліній.

На буравой №38, што на Асташкавіцкай плошчы, адкрыта сталовая. Гэта першая такая сталовая ў рэспубліцы.

Светлагорскі філіял Гомельскага ўніверсітэта марксізма-ленінізма праводзіць прыём слухачоў на агульны факультэт. На факультэт прымаюцца асобы з сярэдняй і вышэйшай адукацыяй. Жадаючыя падаюць у райком КПБ заяву з рэкамендацыяй партыйнай арганізацыі. Заняткі праводзяцца ў памяшканні райкома КПБ.

[свернуть]
1970 год

У Светлагорскім раёне акрамя кінаперасовак пачынаюць працаваць стацыянарныя ўстаноўкі.

У строй дзеючых уступілі другая кордная і серавугляродная вытворчасці. Важнай падзеяй для энергетыкаў Васілевіцкай ДРЭС і для ўсіх светлагорцаў з’явілася тое, што год таму назад у наш горад прыйшоў прыродны газ.

Чацвёрты год у Светлагорску працуе аўтамотаклуб ДТСААФ. Тут рыхтуюцца шафёры першага, другога і трэцяга класаў, матацыклісты для народнай гаспадаркі.

[свернуть]
1971 год

29 ліпеня Светлагорску споўнілася 10 гадоў. Зараз Светлагорск дае краіне ў суткі 4 мільёны 600 тысяч кілават–гадзін электраэнергіі, 5,2 тысячы гігакалорый цеплавой энергіі, 870 кубічных метраў зборнага жалезабетону, 260 тысяч квадратных метраў корднай тканіны, 200 тон гафрыраванай тары, каля 90 тон абгортачнай паперы.

Збудаванні па біялагічнай ачыстцы сцёкавых вод, якія дзейнічаюць на заводзе штучнага валакна, з’яўляюцца аднымі з лепшых у краіне. Па ініцыятыве работнікаў Таварыства аховы прыроды на заводзе вырабілі макет ачышчальных збудаванняў і адправілі яго ў Маскву на выстаўку дасягненняў народнай гаспадаркі СССР. Макет устаноўлены ў павільёне “Ахова прыроды СССР”.

[свернуть]